Sunday, October 25, 2026

ਕਵਿਤਾ - ਮੁਖੌਟੇ



ਉਹਨੇ ਪੂਜਾ ਖ਼ਤਮ ਕੀਤੀ
ਭਗਵਾਨ ਦੀ ਮੂਰਤੀ ਦੇ ਮੱਥੇ ‘ਤੇ ਤਿਲਕ ਲਾਇਆ
ਤਿੰਨ ਵਾਰ “ਸ਼ਾਂਤੀ” ਦਾ ਉੱਚਾਰਣ ਕੀਤਾ
ਪਹਿਲੀ ਵਾਰ “ਸ਼ਾਂਤੀ” ਉੱਚੀ ਆਵਾਜ਼ ਵਿੱਚ
ਅਦਿੱਖ ਸ਼ਕਤੀਆਂ ਨੂੰ ਸੰਬੋਧਨ ਸੀ !
ਦੂਸਰੀ ਵਾਰ “ਸ਼ਾਂਤੀ” ਜ਼ਰਾ ਹੌਲੀ ਆਵਾਜ਼ ਵਿੱਚ
ਆਪਣੇ ਬਿਲਕੁੱਲ ਆਸਪਾਸ ਦੇ
ਵਾਤਾਵਰਣ ਅਤੇ ਲੋਕਾਂ ਲਈ ਸੀ !!
ਤੀਸਰੀ ਵਾਰ “ਸ਼ਾਂਤੀ” ਰਤਾ ਕੁ ਫੁਸਫੁਸਾਹਟ ਜਿਹੀ ਨਾਲ
ਆਪਣੇ ਆਪ ਨੂੰ ਕਿਹਾ !!!
ਸੁਣਿਐ ! ਸਾਡੀਆਂ ਸਭ ਰੁਕਾਵਟਾਂ ਅਤੇ ਸੱਮਸਿਆਵਾਂ
ਆਦਿਦੈਵਿਕ, ਆਧਿਭੌਤਿਕ ਤੇ ਆਧਿਆਤਮਿਕ
ਸਰੋਤਾਂ ਤੋਂ ਹੀ ਪੈਦਾ ਹੁੰਦੀਆਂ ਹਨ ।
ਤਾਂ ਹੀ ਤਾਂ ਉਹਨੇ ਤਿੰਨ ਵਾਰ “ਸ਼ਾਂਤੀ” ਕਿਹਾ
ਅਤੇ ਜਨ-ਸਮੂਹ ਨੂੰ ਸੰਬੋਧਿਤ ਕਰਣ
ਬਾਹਰ ਨਿੱਕਲ ਗਿਆ ।
ਕੁਝ ਚਿਰ ਬਾਅਦ ਹੀ
ਓਹ ਜਨ-ਸਮੂਹ ਸ਼ਹਿਰ ਵਿੱਚ
ਖ਼ੂਨ-ਖ਼ਰਾਬੇ ‘ਤੇ ਉੱਤਰ ਆਇਆ ।
ਅੱਗਾਂ ਲੱਗੀਆਂ
ਲੁੱਟ-ਖੋਹ ਹੋਈ
ਜਿਸਨੂੰ ਖ਼ਬਰਾਂ ਨੇ ਦੰਗਿਆਂ ਦਾ ਨਾਂ ਦਿੱਤਾ ??
ਭਗਵਾਨ ਦੀ ਮੂਰਤੀ ਦੇ ਮੱਥੇ ਦਾ ਤਿਲਕ
ਹੈਰਾਨ ਸੀ ਜਾਂ ਸ਼ਰਮਿੰਦਾ
ਇਹ ਪਤਾ ਨਹੀਂ ???

No comments:

Post a Comment